स्थानीय स्तरको कार्य

टेक्सेसले लक्षित प्रदेशहरूका स्थानीय तह र विद्यालयहरूलाई शिक्षकहरूको पेशागत विकास र व्यवस्थापन लगायत प्रभावकारी शैक्षिक कार्यक्रमहरूको योजना बनाई कार्यान्वयन गर्न सहयोग गर्दै तिनको सुदृढ बनाउन काम गर्नेछ।

टेक्सेसका प्रदेश टोलीहरूले छनोट गरिएका गाउँपालिका र नगरपालिकाका स्थानीय शिक्षा एकाइहरूसँग सहकार्य गर्छन्। यस सहकार्यले स्थानीय शिक्षा एकाइहरूको स्थानीय विद्यालय शिक्षा योजना, वार्षिक कार्ययोजना, बजेट र वार्षिक प्रतिवेदन तयार पार्ने क्षमता बढाउन मद्दत गर्छ। टेक्सेसले शिक्षक तालिमका लागि प्राविधिक सहयोग र बैठक तथा तालिम कार्यक्रमहरूका लागि आर्थिक सहायता पनि प्रदान गर्दछ।

टेक्सेसले छनौट गरिएका पालिकाहरूमा शैक्षणिक स्रोत व्यक्तिको भर्ना र तालिममा सहयोग गर्छ। सुरुका तीन वर्षसम्म टेक्सेसले प्रदेश सरकार र पालिकासँगको समझदारीपत्रअनुसार आंशिक आर्थिक सहायता उपलब्ध गराउनेछ। परियोजनाको पहिलो वर्षमा यो सहयोगको व्यावहारिकता मूल्याङ्कन गरिनेछ।

टेक्सेसले स्थानीय शिक्षा एकाइहरूलाई पालिका र विद्यालय दुवै तहमा अनुशिक्षण र शिक्षक सहायता प्रणालीहरू विकास गर्न पनि सहयोग गर्नेछ। यसमा निम्न कुराहरू रहनेछन्:

• सूचीकृत प्रशिक्षित र विषय विज्ञ शिक्षकहरूका लागि अद्यावधिक तालिम,
• ज्ञान र सीप आदानप्रदानका लागि शिक्षक वृत्त र पेशागत सञ्जालहरूको गठन,
• लक्षित विद्यालयहरूमा शिक्षक सहायता प्रणाली र समावेशी शिक्षा अभ्यासहरूको परीक्षण र संस्थागतकरण।

टेक्सेसले शिक्षण अभ्यासमा सुधार, समावेशी विद्यालय वातावरण निर्माण र विद्यार्थीको सिकाइ अभिवृद्धि गर्न सुपरिवेक्षण, प्रशिक्षण र अनुशिक्षणका साधनहरू प्रदान गर्छ। परियोजनाले समावेशी र गुणस्तरीय शिक्षा प्रवर्द्धनका लागि विद्यालय व्यवस्थापन समिति र अभिभावक-शिक्षक सङ्गठन सदस्यहरूलाई पनि तालिम दिन्छ।

टेक्सेसका प्रदेश टोलीहरूले सफल शिक्षक सहायता प्रणालीहरूलाई अन्य विद्यालयहरूमा विस्तार र परियोजना क्षेत्रभन्दा बाहिर पनि समावेशी शिक्षालाई प्रवर्द्धन गर्न काम गर्नेछन्। परियोजनाले स्थानीय शिक्षा एकाइ र विद्यालयहरूलाई उपलब्ध स्रोतहरूको प्रयोग गरी शिक्षकहरूको सीपमा सुधार ल्याउन र विद्यार्थी केन्द्रित कक्षाकोठा निर्माण गर्न प्रोत्साहित गर्छ।

कर्णाली प्रदेशमा छनोट गरिएका पालिका र विद्यालयहरू